معا.. نحو أولمبياد (القيامة) العامة!

______________________
الطريفي للثوار:
دقوا النحاس والنقاقير والكرنق من جم..
اعزفو أم كيكي والوازا وجرو النم
_______________________
أحمد ضحية
------------
أطـرب يا شـباب الليلة رَفـرف عَلمـكْ
غـاب عَـلم القبيل كَتَّلْ جـدِودك وظَلمَكْ
دير كـاس الطرب واشفى جـرحك وألمكْ
سـطر للوراك تاريـخ نزيـه بي قلمكْ
...
سيد نِحلْ الفراسه وتُنْدُل اللُبَّاسْ
الولدْ البِصُد الحَافِلاتْ يُبَّاسْ
وكتْ الشوفْ يشوفْ سَيفُو البِضَايرْ النَاسْ
الشاعر القومي
"حسن خلف الله يحيى"
…….
الليله استعَدُّوا وركـبوا خيـول الكَرْ
وقِـدامُـن عقـيدُنْ بالأغـرْ دَفـرْ
الليله الأســود الليـله تتــنتـَّرْ
ويا (بشة) الغشيم قول لي جِدادك كرْ
الكنداكة
"مهيرة بنت عبود"
***

أها بعد ما (الصوفية) نزلو ساحات الثورة بالذكر، ومريديهم الذاكرين.. أعمامي (الفور) أجمعوا هنا مع الثوار. ما عندكم عذر.. جيبو النقارة والزمبارة وأم كيكي.. غنوا وارقصوا للصباح. حتوه حت!..
حتى (ابيره ودرت) ذاتو.. وروها للأجيال الجديدة دي! وخلو اهلنا (المساليت) ديل يمتعو الثوار بالكسوك.. ولا شنو يا بركة ساكن!..
طبعا ما محتاجين نقول ليكم سلمية.. سلمية.. يعني سكين في الضراع. لا.. قرجة. لا.. عكاز. لا.. نشاب. لا.. سفروك. لا.. كوكاب او حربة أو أي سلاح معدني او خشبي.. لا والف لا. الطيور ناس عشوشة وقدوم أحمر والمشاطة وود ابرق ديل.. ما بيستاهلو.. بنجيهم واطه (بالنبل بس!)..!..
وامسكو العيال (السغار) ديل ما ينيشو طيور الجنة الملونة، الراكة في اليافطة، الفيها صورة (ضابط الجيش الطلعت اشاعة بتقول انو استشهيد النقيب حامد عثمان حامد والحمد لله اتضح انو حي).. بخت شهداء ثورتنا الابرار.. ما أعظمها ميته.. أن تفدي شعبك بروحك.. تلقاهم هسه يقدلون ساي بين الحور العين!..
الرحمه والمغفرة ليهم ولكل شهداء الحرية والعدالة الاجتماعية عبر تاريخ الانسانية. والصبر والسلوان لكل أهالي الشهداء والثوار جميعا.. وجبر الله كسر الوطن!.. ادعيتنا بالشفاء العاجل للجرحى والمصابين، وأن يمن الله على الثوار، بمزيد من الصمود والحماية.. لازم نمشي في السكة نمد..
المهم.
قبايل السودان كلها الموجوده في الخرطوم.. تجمع لينا هنا. في الميدان ده.. بثقافتها وآدابها وفنونها.. وطنبور الشوايقة وغناهم الحنين داك. أموت أنا في الشوايقة.. (قصدي الطمبور).. حنين وأسيان.. يخلي شعر جلدك كلو يكلب.. زي حزن ام كيكي.. وأنيين الزمبارة..
يا اخوانا عايزين السودانيين يعمقوا معرفتهم ب(بعض).. وبثقافات (بعض).. عشان كل التصورات الخاطئه عن (بعض) تسقط الى الابد.. حتى الجنوبيين القاعدين في العاصمة.. بالله اجمعوا هنا معانا.. انحنا ما مسئولين عن مؤامرات الكيزان.. انتو جزء من وجداننا.. مافيش قوة في الأرض تقدر تفصلنا..

ويا ثوار .. بالثورة دي. الشعب بيكون ضرب مليون عصفور بحجر واحد.. ما قلنا ليكم مشكلتنا. ليست انو بشبش وكيزانو (يسقطوا بس!).. والموضوع كده خلاص انتهى!!.. لا. لا.. كده ياداب إبتدا.. كل المشاكل التاريخية تتصلب هنا.. في ميدان (القيامة العامة) دة.. علشان لما نرجع بيوتنا. نكون غسلنا آخر الادران!..

التجمع الملاييني ده فرصه ما تتعوض. لعروض المسرح والثقافة والغناء. في كل أجزاء هذا الوطن المتنوع الجميل. فعليكم الله ما تضيعوا الفرصه دي.. جيبو الفرق الشعبية. وطلاب الخلاوى. خلوهم يقروا القرءان هنا.. على ضوء (تقاقيب) الثورة.. وحتى المداحين ذاتهم جيبوهم.. وما تنسوا الحكامات والغنايين.. الناس الحرفا في إيقاعات الجراري والهداي والكمبلا والشاشاي.. ياخي سودانا ده غني بمفرداتو الثقافيهشرقا وغرب شمالا وجنوب بشكل محير! مافيش أجمل من تنوعنا ده. ما كمان البطن بطرانة.. ولدتنا كلنا نفس الام.. الارض دي..
خلوه أولمبياد سوداني يدهش العالم كلو. ويلقنو دروس في (علم الثورة السودانية). احتفاء بهذه الثورة التي خلدها التاريخ.. لن ينسى التاريخ شعبا كهذا الشعب. الذي كما قال شاعره العاقب ود موسى العيشابي:
نِحَنا بنسوي وما بــنقول سـويـنا
نحنا نفرتِق الكرنه أم صِفوف بـإيدينا
الزول البضيف عَـدم الشداعَه عليـنا
يفهم مِني ويسأل من تـوارخَ النيـنه
...
نِحـنا صَـواقع البَرق الشَـلع ضَحـوِّيه
ونِحنا الفوق نِحاسـنا بِنلـعبْ الصَقـرِّيه
نِحـنا صَغـيرنا مَـاموناً يلاقـي المِيـه
هلا هلا عليكم.. انتو يا اهل الدوبيت والمسادير.. أهلي عرب البطانة وبني جرار.. يلا يا (خيلاني).. يلا تعالوا احيو (ليالي الثورة) بنحاسكم.. بالدوبيت والمسادير.. وجرو النم.. العرضة حقتكم.. اضرعوا احتفاء بالوطن..
أهلنا النوبة ما تنسو الكرنق.. عايزين هنا (سبر اللوبيا) ذاتو واللوبيا شخصيا تجمع هنا بليلة مباشر.. صاحبي زي الزين. مكتول في جبل الجمنق!..
وانتو يا بجا تعالو بسيوف خشب بالله (قلنالكم سلميه). تعالوا اعملوا عرض للتراث الشعبي.. ويا أخوانا الثوار هييي.. قبيلة الشيوعيين ديل حبيبتنا.. شعر شاعر الشعب.. ابونا الخالد الراحل المقيم (محجوب شريف)، طيب الله ثراه!.. وشعر حميد واقف ليهم في حلقهم.. عليكم الله أدوا قبيلة الشيوعيين فرصه. انشاء الله يعملو (كولينج) لكل فعاليات الأولمبياد ده..
عايزينو أولمبياد منظم زي المعارض الدولية. بخيمو المتخصصة في النشاط المعني.. شعر.. قصة.. عرض مسرح.. معرض تشكيلي.. رقص شعبي.. كل شي.. كل شي.. يرسم لوحة تنوعنا.. حتى البوسترات عن أقاليمنا المناخية والنباتية، المتدرجة من الصحراء للسافنا واقليم المتوسط.. شي عجيب بلد متنوع، حتى في مناخاتو ونباتاتو وناسو ولغاتو وثقافاتو، وأديانو.. دي ما الجنة ذاتها! ولا شنو؟!..
الجيل ده خيالو خلاق ومبدع.. لازم نجاريهو.. تعبنا من أحزاب (الخيال السياسي الضعيف) العتيقة. اللسة بفتسو في الماضي، فاكرين الخرطوم دي ياها ذاتها خرطوم زمان.. زمنهم الداخلي واقف في سنة 1956 لسه ما اتحركوا لحاضرنا ده.. حاضر ما بعد الحداثه والعولمة والانسان الكوني، اللي أساسا نوع مشاكل السودان إتجاوزها من كونو الامم المتحدة على أنقاض عصبة الإمم!
شوفو يا ناس المسرح.. ياخي إشتقنا لسودان المسرح القومي. فشنو لو عملتو لينا مسرحية (سقوط الطاغية) وتمثلوها في ميادين (القيامة العامة) دي. وانتو يا موسيقيين جنبهم طوالي لمحبي الطرب غنوا لينا (أغنية الانتصار).. وانتو يا شعراء.. عايزين في ميدان الاعتصام ده.. ليالي شعرية كاربة.. تستدعي أمجاد أجدادنا كلهم.. من بعنخي واحتلالو لمصر. بسبب (إساءتها معاملة الخيول).. مرورا باسترداد الخرطوم.. ومقتل غردون.. واستشهاد عبد الفضيل الماظ. وهو ماسك مدفعو المكسيم. في ثوره 1924.. علمو (الكيزان الطفابيع) عينة كلاب الحكومة الزي حسين خوجلي وضياء بلال والهندي عز الدين ويونس محمود السيكوباتي (المختل) اسحق فضل الله.. وغيرهم من الأدعياء المنحطين.. كيف يكون الإعلام والإبداع.. عندنا زمن ما مستعجلين. أساسا عملية (الترانزيشن للسلطة) هتاخد وكت.. فقاعدين يامان هنا باحتفالاتنا وتمباكنا وسجايرنا.. وبكرة دي ياسر عبد اللطيف جاي بجيتارو. وعبد الله مكي بعودو.. حللنا بوخها يلوي.. نحن والكنداكات بنطبخ كتفا بكتف..
اشتهينا معارض التشكيل ياخ.. بالله يا (عصام قيسان) معارض تشكيلية جوا الميدان ده.. فيها كل شعارات الثورة السودانية.. وكاريكاتيرات الكاريكاتيرست، منذ أول انطلاق لها حتى الآن.. عايزين نمارس الحياة ياخ.. ونرسل للعالم رسائل عن جمال ثورتنا. ثورة الحقوق و الآداب والفنون، وتوطين التكنلوجيا. والتصنيع والزراعة، و العبور بالسودان للضفة الأخرى، حيث الدول المتقدمة و المزدهرة، التي تنعم شعوبها بالرفاهية.. والله صحي! ..
وما تنسوا على الهامش كده.. خلو الجلاكين يفصفضو ذكرياتهم في(منتدى الثورة) ويحكو حكايات.. زي حكايات دكان ود البصير.. الحصة وطن يا مان.. الكل يشارك.. ده فرض عين.. ما بيسقط.. الراستات كلهم هنا. و كل الآداب والفنون حاضره. (المافي شنو).. كدي قول لي؟!.. عايزين الميلونيات دي.. تحول ساحات القياده العامه.. لاضخم احتفال (ابداعي ثقافي فني فكري ثوري) يعرفو التاريخ. حاجه أصلو ما حصلت، في ثورة قبل كده.. ما فاضيه للأولمبياد.. والمرأة عليكم الله.. الثورة دي حقتها.. أها يا كنداكات سمعونا زغرودة في حضرة جلال الوطن والكنداكات الثائرات وثوارنا الأماجد.. حبوبتكن الكنداكة بنونة بنت المك نمر قالت:
صَمَدْ البِجَنْ عَرْكُوسْ
وبِلمَعْ فَوقْ ضُهور خَيلاً قماري لُبوسْ
وكتينْ الرِجال تِشَامَرْ المَلبُوسْ
سَيفُو بِخَلِصْ الفَارِس مع الكَرْبُوسْ
….
زَامْ أسد الكَدادْ بين القُدَينْ واللُوسْ
وفي غَابْتُو الضَرِيَّه أحمَى الخَلِقْ ما تكُوسْ
مَعْلُوم عِنْ مُلاقاة الرِجال كَابُوسْ
وكُلْ الرِجالْ تَقولْ مِن دَربَك الحَابُوسْ
….
كَمْ شَديتْ على طَرْزَه وجَنى امْ مَحَسُوسْ
ولِبْسَك تندلو ودَهَجَكْ بضربوا كَروسْ
كَمْ شَقيتْ هَامه وكَمْ فَلَقتَ ضُرُوسْ
وكَمْ جَدَعْ رِجالاً بَىْ ضراعَكْ المَسْيُوسْ
….
كَمْ شديتْ على كِيكاً نَوايبُو كَرَكْ
وكَمْ شَقَيتْ وكَمْ دَخَلتَ دَرَكْ
قَارْحَك عِنْ مُلاقاة الخُيولْ مَا جَكْ
…..
جَنَكْ مَشِيهِنْ عَكْ
والخيلْ بَادَرنْ شِبِعْ عَقِيدَك سَكْ
سَيفَكْ بِسَوِّي النَكْ
وحَرَسكْ مِنْ عَجِيبْ
إنتَ العَليكْ الرَّكْ
...
ومِنْ حِسَكْ تَقُومْ البَاديَّه تِتْحرَكْ
الولدْ البِسِومْ الرَوح ويِدَّرَكْ
دَمَرَتُو العَبُوسْ
خَتَّ الحِمِلْ وترَكْ
….
يا لِسَانِي جِيبْ النَّمْ
الخَيلْ رَوَقَنْ ما بْقُولْ عِدَادِنْ كَمْ
فَرْتَاقْ عُقْدَتِنْ مَلايْ سِرُوجِنْ دَمْ
….
ما دَايْرَالَكْ المِيتَه امْ رَماداً شَّحْ
دايراكْ يوم لُقَا في دَمِيكَ تِتْوَشَّحْ
وكتَ الخَيل تِتْدَعِكْ والسَيفْ يِسَوِّي التَّحْ
والميتْ مَسولبْ والعَجاجْ يِكْتَحْ..
#الاضراب_السياسي
#الانتفاضة_العامة
#جيش_ واحد_شعب_واحد
#القيامة_ العامة_ نفر
#الحل_في_البل_ يا_عمك.
#الحق_الاعتصام_قفل _و_احتفل
#مدن_السودان_تنتفض
#الثورة_مستمرة_و_النصر_أكيد